Mi nomber ta Curtvin Bacuna, nase na  Kòrsou i aktualmente bibando na Hulanda.

Karnaval ta un evenemento ku for di chikitu mi ta gusta i tabata bai mira. Bo por bisa ke é entusiasmo ku mi tin, ta bini door di mi mayornan ku tambe ta un gran fanátiko di e evenemento soshal kultural aki. Komo mucha semper mi a para kantu di kaminda. Un aña  so mi a partisipá den Karnaval Hubenil, lokual mi nò a gusta. E époka ey, pa ami na banda tabatin mas ambiente.

 

Na teener un amiga a konvensé mi pa purba i partisipá den Gran Marcha. Esaki mi a eksperensia komo algu super sensacional. E diferensia, por ta, komo mucha bo ta wordu guia, sinembargo den Gran Marcha bo ta mas liber i tin mas kontakto ku públiko y ademas bo por ta bo mes. For di e aña ey ta den dje mi kier ta.

 

Pa ami Karnaval no ta esun dia ey so, pero tur e dia-nan, siman-nan i luna-nan anterior den kua e grupo ta uni, trahando riba e trahenan. E trahamentu huntu, harimentu, kantamentu, bailamentu, interkambio di eksperenshanan di den bida, kontamentu di chiste, komementu, e stressnan y tambe e interkambio di palabra, ta esaki pa ami ta KARNAVAL.

 

E dia mes ta un kulminashon di bo trabou pa asina presentá bo trabou na e públiko. I si e públiko atmirá bo i duna bo un palabra di elogio, ta un konorashon riba bo trabou y esaki ta hasi mi orguyoso. P'esei importante pa ami ta pa e disfras ta bon akaba, tema ta bon presentá, pa asina duna es nan kantu di kaminda un show pa tur ora ku nan tabata warda. Esaki ta algu ku sigur mi a realisá ku disfrasnan bunita, apart i bon akaba.

 

Mi ta sumamente kontentu ku mi por kontribuí na mi forma ku e grupo aki,

NAN A YEGA, pa asina engrandese nos Karnaval i brinda pueblo di Kòrsou ku un trahe bunita.

 

Ami lo forma parti di e Gran Marcha 2011 huntu ku e grupo  „NAN A YEGA „ i abo ?

 

 

 

 

Curtvin Bacuna